Акафист святой мученице Валентине
Акафист святой мученице Валентине
Кондак 1
Избранная Господом для свидетельства истинныя веры, мужественно поправшая языческое нечестие и за своя страдания нетленным венцем от Жениха Христа увенчанная, святая мученице Валентино, ныне ублажаем святую память твою. Ты же, яко имущая дерзновение ко Господу, молися за ны, прославляющих тя пении сими: Радуйся, святая мученице Валентино, силу любви своея к Богу явившая.
Икос 1
Ангельскую чистоту в земном житии своем непорочно сохранила еси, святая мученице Валентино, ныне же в чертозе Жениха Твоего со Ангелы вкупе воспеваеши Богу трисвятую песнь на небеси. Мы же, чистоту жития твоего девственнаго восхваляюще, молим тя, приими от нас, поющих тебе на земли глаголами веры, хвалебное пение сице: Радуйся, дево нескверная. Радуйся, Господу верная. Радуйся, с Ним обвенчанная. Радуйся, в рай Божий званная. Радуйся, Жемчуг нашедшая. Радуйся, в Царствие вшедшая. Радуйся, суетный мир победившая. Радуйся, вечную жизнь возлюбившая. Радуйся, во благочестии жившая. Радуйся, тем Жениха ублажившая. Радуйся, в Божиим страсе пребывшая. Радуйся, верная раба Бога бывшая. Радуйся, святая мученице Валентино, силу любви своея к Богу явившая.
Кондак 2
Видя Господь душу твою силою дивною исполнену, яви тя, святая мученице Валентино, адаманта твердейшу, да мужественно исповедаеши веру истинную во Христа Иисуса вкупе со святыми девами Еннафою и Павлою, Ему же с ними вопияла еси: Аллилуиа.
Икос 2
Разумом своим, просвещенным от Бога, познала еси, святая мученице Валентино, яко идоли не можаху спасти души твоея. Егда же наста час испытания твоего, предаху тя на судище неверных, идеже правитель Фирмилиан виновною в непочитании языческих богов призна тя. Ты же, приведенная в языческий храм для поклонения идолом, отвергше тыя, камень дерзостно в жертвенник бросила еси, воскликнувши: Токмо Христос спасе душу мою! Тем же, прославляя велию веру твою, вопием ти: Радуйся, славная дщерь Кесарии. Радуйся, верная Деве Марии. Радуйся, Ею безмерно любимая. Радуйся, Ея благодатию хранимая. Радуйся, Деве во всем угодившая. Радуйся, в руце Ея душу свою вручившая. Радуйся, Сына Ея возлюбила еси. Радуйся, Пречистою Девою прославлена на небеси. Радуйся, с девами в лице святых пребываеши. Радуйся, с ними Христа восхваляеши. Радуйся, блага нетленны вкушаеши. Радуйся, их возжелати нам внушаеши. Радуйся, святая мученице Валентино, силу любви своея к Богу явившая.
Кондак 3
Сила Вышняго даде тогда тебе, святая мученице Валентино, укрепление на тяжкия страдания телеси твоего, да не убоишися лютаго прещения. Преданная на мучения, якоже на брачный пир со Женихом своим, с радостию потекла еси. Мы же благодарственно зовем укрепившему тя Господу сил: Аллилуиа.
Икос 3
Имущи крепкую надежду токмо на Единаго Бога, святая мученице Валентино, не повиновалася еси повелению мучителя твоего воздати жертву идолам мерзким и не убоялася еси грядущих мучений. Темже, удивляяся силе духа твоего, в немощнем телеси твоем пребывающия, умиленно поем ти: Радуйся, муки велии терпевшая. Радуйся, Христу изменяти не хотевшая. Радуйся, Ним токмо жившая. Радуйся, девство свое сохранившая. Радуйся, токмо Христа в своем сердце имевшая. Радуйся, жизни своей Его ради не жалевшая. Радуйся, Ангелом дивно хранимая. Радуйся, Господом присно любимая. Радуйся, юность Христу посвятившая. Радуйся, живот свой Ним освятившая. Радуйся, горлицею в небе парящая. Радуйся, в святости душу хранящая. Радуйся, святая мученице Валентино, силу любви своея к Богу явившая.
Кондак 4
Буря ярости и гнева страшнаго мучителя твоего не возможе поколебати храма души твоея, основанном на твердем камени веры Христовыя. В тяжких страданиях ты, святая мученице Валентино, веру хранила еси, яже бысть ти бронею непреоборимою. Темже, в мучениях своих укрепляемая Богом, воспевала еси душею Ему песнь: Аллилуиа.
Икос 4
Слышав от тебе, святая мученице Валентино, жестокий мучитель твой, яко Господа славиши верно, якоже лютый змий устремися на кроткую душу твою. Лестию сладкою своею не можаше сломити силу веры твоея, предаде тя на лютыя страдания. Мы же, тебе состраждущи, со слезами поем: Радуйся, в силу Христом облаченная. Радуйся, силою тою защищенная. Радуйся, огнь претерпевшая. Радуйся, к Богу любовию горевшая. Радуйся, сладость любви тоя познавшая. Радуйся, с Богом себе сочетавшая. Радуйся, люто по ребрам биенная. Радуйся, мучителем не побежденная. Радуйся, душу Христом усладившая. Радуйся, с Ним всех врагов победившая. Радуйся, яко в раю процветаеши. Радуйся, в нем со Христом обитаеши. Радуйся, святая мученице Валентино, силу любви своея к Богу явившая.
Кондак 5
Боготечною звездою явилася еси, святая мученице Валентино, посреде языческаго капища стоящи, егда светом веры своея затмила еси свет идольскаго жертвенника. О, чудная дево святая, ты на небеси душею своею сияеши у престола Творца, молися же за нас, да возсияет свет истинныя веры в наших смиренных сердцах, поющих Творцу света песнь: Аллилуиа.
Икос 5
Видевши велию силу твою, еюже ты претерпела еси вся страдания и муки, святая мученице Валентино, Святая Церковь ублажает тя за верность Христу, почитая пении сими: Радуйся, веру в Христа сохранившая. Радуйся, райскую сладость вкусившая. Радуйся, к девам святым сопричтенная. Радуйся, славою велицей почтенная. Радуйся, к Богу путем тесным шедшая. Радуйся, в радость Христа им восшедшая. Радуйся, образ терпения нам подающая. Радуйся, любящим Бога защиту дающая. Радуйся, славити Его всегда нам помогаеши. Радуйся, помыслы добры в умы нам влагаеши. Радуйся, идолом мерзким ты не поклонилася. Радуйся, тем от падения ты сохранилася. Радуйся, святая мученице Валентино, силу любви своея к Богу явившая.
Кондак 6
Проповедует весь мир христианский славныя подвиги твоя, святая мученице Валентино, ими же прославила еси Христа Бога нашего, мучения и страдания твоя славит, ублажает мученическую кончину твою, воспевая Богу хвалу: Аллилуиа.
Икос 6
Воссияла еси паче солнца, святая мученице Валентино, услышавше о предании твоем на мечное усечение вкупе со святою девою Еннафою, ко Христу поспешила еси и, не жалея главы своея, смело подклонила еси ея под меч. Тем же, взирающе на велию крепость души твоея, с любовью глаголем ти сице: Радуйся, Богу во всем угодившая. Радуйся, свято пред Богом ходившая. Радуйся, идолов смело поправшая. Радуйся, ко Господу с верою взывавшая. Радуйся, Духом Святым насыщенная. Радуйся, светом Христа просвещенная. Радуйся, жити в благочестии нас наставляеши. Радуйся, в сем житии нас укрепляеши. Радуйся, тобою бо идолопоклонницы посрамишася. Радуйся, тобою бо Единому Господу покланятися научишася. Радуйся, мечнаго усечения не убоялася еси. Радуйся, им бо с Господом сочеталася еси. Радуйся, святая мученице Валентино, силу любви своея к Богу явившая.
Кондак 7
Хотя Владыка и Господь Славы явити тя, святая мученице Валентино, яко невесту Себе верную, испытаньми многими и страданьми многотрудными обложи тя. Ты же любовию ко Христу преисполнена, доблественне все претерпела еси, Христа дерзновенно исповедуя, якоже три отроцы в пещи, воспевая любящему нас Богу: Аллилуиа.
Икос 7
Новаго чуда быша свидетелие людие града Кесарийскаго, святая мученице Валентино, егда видящи, яко ты телесем своим млада еси, душею же зрела пребываеши, да мужественно вся страдания за Христа переносиши. Сего ради, увидевши велию веру твою, многия из них увероваша в Господа, восклицая: Велик Бог христианский! Мы же, рцем ти похвалами таковыми: Радуйся, многих к Богу приведшая. Радуйся, звездою на небо возшедшая. Радуйся, яко в лице святых сияеши. Радуйся, Бога за нас умоляеши. Радуйся, Материю Бога прославлена. Радуйся, Ею пред Сыном поставлена. Радуйся, страданиями ко Христу возводящая. Радуйся, терпением мук за Христа в рай вводящая. Радуйся, лести епарха не внявшая. Радуйся, муки за истинну веры принявшая. Радуйся, в жертвенник камень вергшая. Радуйся, крестным знамением себе осенявшая. Радуйся, святая мученице Валентино, силу любви своея к Богу явившая.
Кондак 8
Странно и страшно бысть страдание твое за Христа людем, не ведущим Бога, святая мученице Валентино. Ты же, с радостию принимала еси муки за Сладчайшаго Жениха своего, кровию неповинною душу свою убеляла еси, хвалу воздавая Творцу: Аллилуиа.
Икос 8
Вся суетныя красоты и радости мира сего принесла еси, святая мученице Валентино, в жертву спасительную Вседержителю Богу. От Него же получила еси награду велию на небеси, яже нетленною будет во веки. Сподоби, святая, и нас быти увенчанными Творцом нетленными небесными венцы, сего ради тебе воспеваем: Радуйся, Бисер единожды купившая. Радуйся, дивный венец получившая. Радуйся, кровию себе убелившая. Радуйся, Пасху нетленну вкусившая. Радуйся, Хлебом небесным питаешися. Радуйся, к благам Христовым приобщаешися. Радуйся, милость от Богам всем верным приносиши. Радуйся, нам оставляти грехи Бога просиши. Радуйся, усердней молитве Творцу научаеши. Радуйся, нашим прошениям ныне внимаеши. Радуйся, от горьких мучений еси избавительница. Радуйся, в Отчем доме со всеми святыми обитательница. Радуйся, святая мученице Валентино, силу любви своея к Богу явившая.
Кондак 9
Все естество ангельское возрадовася зело, видя тя, святая мученице Валентино, истинным Богом Христа исповедавшую. Ангельски жизнь свою пожила еси и подвигом славным Христа ублажила еси, ныне же поеши Ему купно со ангелы: Аллилуиа.
Икос 9
Ветийство человеческое не возможе по достоянию восхвалити тя, святая мученице Валентино, за вся страдания твоя, яже претерпела еси за возлюбленнаго тобою Христа Иисуса. Темже, ублажая мученическую кончину твою, поем умиленно сие: Радуйся, Ангелов всех удивившая. Радуйся, чистую душу пред ними явившая. Радуйся, ними с любовию приятая. Радуйся, вкупе со Христом сораспятая. Радуйся, Агнчею кровию омытая. Радуйся, присно Творцом не забытая. Радуйся, нас от клеветы избавляеши. Радуйся, яко силою молитвы своея защищаеши. Радуйся, нас ко блаженству ведущая. Радуйся, образ смирения нам подающая. Радуйся, наших сердец услаждение. Радуйся, в истинной вере укрепление. Радуйся, святая мученице Валентино, силу любви своея к Богу явившая.
Кондак 10
Спасения и вечнаго покоя достигла еси, святая мученице Валентино, претерпела бо еси многия скорби и мучения в земном житии своем. Научай же, и ны грешныя, шествовати истинным путем, да не соблазнимся путями иными. Дай силы и нам в благодушии вся претерпети Христа ради, воспевая усердно Ему: Аллилуиа.
Икос 10
Стена и надежное прибежище еси, святая мученице Валентино, всем жаждущим спасения, о них же в молитве пред Богом ходатайствуеши. Тем же и нам, с любовию к тебе припадающим, буди стена и ограждение непреоборимое, да твоими молитвами внидем в радость Господа своего и веселящеся в Бозе, вопием ти радостно: Радуйся, нам ты во всем помогаеши. Радуйся, нас от врагов защищаеши. Радуйся, наше еси заступление. Радуйся, всем подаеши исправление. Радуйся, Бога любити научаеши. Радуйся, к людям любовь источаеши. Радуйся, свете небесный во мраке светящий. Радуйся, огне любви к ближним, ныне горящий. Радуйся, зрением славы Творца присно ты утешаешися. Радуйся, видением Лика Его присно ты услаждаешися. Радуйся, Божия тайны созерцающая. Радуйся, со Ангелы Бога присно прославляющая. Радуйся, святая мученице Валентино, силу любви своея к Богу явившая.
Кондак 11
Пение умиленное приносим ти, святая мученице Валентино, да соединиши его со пением Ангельскаго лика на небеси, в нем же непрестанно славиши Бога со святыми вкупе: Аллилуиа.
Икос 11
Светозарнаго дне всеобщаго воскресения и Страшнаго Суда Божия чающе, ужасаемся множества грехов своих. Имея же тя, святая мученице Валентино, яко теплую предстательницу о нас пред Богом, благодарственно взываем ти: Радуйся, на тя бо всегда уповаем. Радуйся, встречи с тобой светло чаем. Радуйся, наша помощнице скорая. Радуйся, наставнице нам добрая. Радуйся, наши телеса исцеляеши. Радуйся, души в скорбех укрепляеши. Радуйся, нам похвало за терпение. Радуйся, к Богу любови горение. Радуйся, яко свеща путь во тьме осветившая. Радуйся, идолов лесть светом Христовым умертвившая. Радуйся, в сонме святых пребываеши. Радуйся, нас в оный сонм призываеши. Радуйся, святая мученице Валентино, силу любви своея к Богу явившая.
Кондак 12
Благодать свыше щедро нам сниспошли, святая мученице Валентино, прилежно молящимся тебе, и испроси у Господа прощение всех согрешений наших. Не престай помогати нам, славящим о тебе Христа Бога нашего, поющи Ему: Аллилуиа.
Икос 12
Поюще подвиги твоя, поклоняемся страданию твоему, святая мученице Валентино, восхваляем отшествие твое во Отечествие наше небесное, идеже ты ныне со Ангелы и всеми Святыми ликуеши во славе Творца. Молим тя, простри с небесе и на ны твою благодатную помощь, вопиющих ти: Радуйся, живот свой Богу отдавшая. Радуйся, кровь за Него пролиявшая. Радуйся, много наград получившая. Радуйся, в Царствии часть улучившая. Радуйся, в Бозе всегда пребываеши. Радуйся, скорби вся с Ним забываеши. Радуйся, наша пред Богом заступнице. Радуйся, наша в сем поприще спутнице. Радуйся, наше шествие облегчаеши. Радуйся, крест нам нести помогаеши. Радуйся, яко все христианы на тебе уповают. Радуйся, яко тезоименитии с тобою купно бытии желают. Радуйся, святая мученице Валентино, силу любви своея к Богу явившая.
Кондак 13
О, всеславная и великоименитая мученице Христова Валентино, девства и чистоты хранительнице. Приими от недостойных раб твоих сие малое моление, с любовию тебе приносимое. Испроси у Христа Бога даровати нам чистоту душевную и телесную, да чистии внидем в Царстие Божие и купно с тобою во веки веков сподобимся воспевати Богу хвалу: Аллилуиа. Аллилуиа. Аллилуиа.
Сей кондак читается трижды. Затем икос 1 и кондак 1.
Молитва
О, многострадальная и премудрая мученице Христова Валентино! Ныне почитюще святую память твою, к тебе мы, грешнии и недостойнии, усердно прибегаем и во умилении сердец наших молимся. Ты паче всех благ земных Сладчайшаго Господа нашего Иисуса Христа возлюбила еси и Тому чрез все житие верно последовала еси, Божественною благодатию душу свою питающе. Испроси убо и нам у Христа Бога благодать просвещающую нас, да ею осеняемии, в вере и благочестии, в подвизех же целомудрия и любви преуспевати будем и Христу в ближних Его служити неленостно потщимся. Моли убо Христа Спаса да сподобит и нас странствие наше земное во временем сем веце непреткновенно совершити, и в мире и покаянии житие наше скончати, да тако на земли поживше, вечныя и блаженныя жизни на небеси сподобимся и тамо с тобою и со всеми святыми вкупе восхвалим Троицу Единосущную и нераздельную, и воспоем Едино Божество, Отца и Сына и Святаго Духа во веки веков. Аминь.
Тропарь, гл. 8
Жениха своего Христа сладце возлюбила еси, святая мученице Валентино, и с мудрыми девами во след Ему потекла еси, все красоты мира призревши. Тем же Христос венца нетленнаго сподоби тя, Егоже моли спастися душам нашим.
Кондак, гл. 4
Во страдании твоем Христа не оставила еси и по смерти своей с Ним присно пребываеши. Верою прибегающие в Божественную церковь твою и торжестующе память твою, молим тя, святая мученице Валентино, да избавимся недуг душевных и телесных твоим чудным заступлением.
Тропарь, гл. 4
Агница Твоя, Иисусе, Валентина, зовет велиим гласом: Тебе, Женише мой, люблю, и, Тебе ищущи, страдальчествую, и сраспинаюся, и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою. Но, яко жертву непорочну, приими мя, с любовию пожершуюся Тебе. Тоя молитвами, яко милостив, спаси души наша.
Кондак, гл. 2
Храм твой всечестный, яко цельбу душевную обретше, вси вернии велегласно вопием ти: дево мученице Валентино, великоименитая, Христа Бога моли непрестанно о всех нас.
День памяти: 23 февраля (н.ст.)
Величание
Величаем тя, страстотерпице Христова Валентино, и чтим честная страдания твою, яже за Христа претерпела еси.
Житие святой мученицы Валентины
(память 10/23 февраля)
Святая мученица Валентина за исповедание христианской веры приняла мученическую кончину от Фирмилиана, правителя палестинской области. Святая Валентина происходила из окрестностей города Кесарии (большого город в Палестине, при Средиземном море, где пребывали римские прокураторы, - представители римской императорской власти. В настоящее время на месте Кесарии только одни развалины, покрытые дикими растениями). Св. Валентина была девицей и ее телесная красота сочеталась в ней с красотой душевной. По обвинению в непочитании языческих богов святая Валентина была приведена на суд к Фирмилиану, и тот приказал ей принести жертву идолам. С этою целью ее повели в языческий храм, стоявший неподалеку от судилища. Но когда святая была приведена в храм, то, вместо того, чтобы принести жертву идолам, она смело бросила на жертвенник камень и обратилась к пылавшему на нем огню спиною. Тогда Фирмилиан пришел в ярость и повелел нещадно бить ее по ребрам, а затем приговорил ее к усечению мечем. Пострадала святая мученица Валентина при Максимиане ІІ Галерии в 308 году.
Назад к списку
.jpg)
.jpg)
.jpg)
.gif)
